А.Е.Ванеевлöн олöм да творчество серти WEB-квест 

Пыдди пуктана серпасасьысьяс!

   Тiян мог – аддзыны серпасъяс, кодъяс эськ⁠ö лöсяласны сет⁠öм кывбуръяс дорö. Дасьтöй ассьыныд серпасъяс.

     Кутшöм кывбур юкöнлы лöсялöны серпасъясыс? Мый могысь кывбур дорö колöны серпасъяс? Кутшöм нöшта позьö лöсьöдны серпас?

      Творческöй удж: уджсö лöсьöдны серпасасян альбом моз.

 Жонь

Кумач морöса жонь, ичöт жонь,
Кöдзыд дырйиыс кыдзи тэ овлан?
Ог нин юась ме, кынмывлан он.
Тэ öд миян моз пасьяс он новлы.
Тöв кöть гожöм, кöть тулыс, кöть ар,
Гумла доръясын бергалан-гартчан.
И кöть кöдзыд, кöть шоныд, кöть жар,
Аскöд орччöн ме пыр тэнö аддза.
Муса жонь, тэ он быдöнлы доль,
Сьöкыд вуджны пö турöба кадтö.
А мый Войвывтö ассьыд он коль,
Тэныд аттьö сэсь, зэв ыджыд аттьö!

Ниа

Сикт бокын красуйтчö ниа –
Медвылö лэптöма юр.
Ас синнас аддзылiс сiйö
Нэм чöжнас омöль и бур.

Тöдлiс, кыдз ур кыйны арын
Восьлалö пищаля зон.
Тöдлiс, кыдз гаръясысь тарöс
Азыма увтлывлö пон.

Аддзывлiс шондiа лунъяс,
Аддзывлiс зэр сора лым.
Юр весьттi неöтчыд мунлiс
Чардбиöн сьöласьысь гым.

Нюмъялысь шондi кö авъя,
Мустöм зэв бушковлöн грöз.
Да-й абу öткодьöсь ставныс
Парматi ветлöдлысь йöз.

Öти морт ветлö да сьылö,
Тшöктö кыдз мывкыд да сям.
Пармаыс быттьöкö сылы
Чужöмсянь радейтан мам.

Мöдлöн – кöть курччалас ульöн,
Синмыс, кыдз сутшкасьысь ем.
Тöдсаöсь найö дзор пулы –
Некымын сэтшöмыс эм.

Тöдö, мый войтырыс миян
Унджыкыс сьöлöмнас бур.
Сiйöн и радуйтчö ниа,
Катлöдлö чатöртöм юр.